A esta mesa redonda van asistir coleutivos de la comunidá educativa afeutaos pola xuba de precios nel serviciu
El llunes 13 de mayu Aína va celebrar una mesa redonda na Casa Cultura Escueles Dorado de Sama (Llangréu) a les 18:00h que va abordar la problemática xurdida col aumentu de los precios de los comedores públicos nes escueles. L’alministración sigue inorando les reivindicaciones de les usuaries y les trabayadores d’estos servicios, que vienen produciéndose nes últimes selmanes y a les que’l partíu lleva sofitando desque se conoció la noticia.
Van participar nel actu David Fernández, representante de les families afeutaes en Siero; Lucía Peral y Guzmán Alonso, del coleutivu de families usuaries del serviciu en Llangréu; y, per otru llau, Xuacu Rodríguez, cocineru y militante d’Izquierda Sindical Asturiana. La mesa va moderala la nuestra compañera de la Mesa Nacional, María Fernández.
Dende Aína queremos defender el bienestar y la igualdá d’oportunidaes de la reciella y apostar por un sistema nel que’l beneficiu de les empreses nun prime penriba del accesu a unos servicios xustos pa tol mundu. Valorar l’estáu actual de la cuestión y tentar atopar soluciones pa ello son dalgunos de los asuntos que vamos tratar nesta mesa redonda entamada pol partíu. Convidamos a tola militancia y persones implicaes a participar nel actu y apurrir el so puntu de vista pa trabayar xuntes por un entornu educativu equitativu pa toles estudiantes.