La plataforma, con más de trenta años d’historia, convidónos a participar y agora presentamos un informe nel qu’esponemos les nuestres idees
Aína presenta un informe sobro la incineración industrial de residuos nel nuestru territoriu como entidá participante nel Conceyu Contra la Incineración n’Asturies. La comisión encargada de trabayar nesta estaya fai un analís panorámicu del estáu de la cuestión y ellabora una riestra de propuestes pa solucionar esti problema qu’afeuta al día a día de les asturianes.
El Conceyu Contra la Incineración ye una plataforma que surde en 1992 pa lluchar contra la instalación y funcionamientu de plantes incineradores de residuu. Fórmenla delles organizaciones ecoloxistes, asociaciones vecinales, partíos políticos y persones individuales. Na so reactivación nel añu 2024, la plataforma convidó a Aína a participar nes sos xuntes y dende’l partíu comprometímonos a implicanos activamente nella. Nel resume redactáu pola comisión creada pa trabayar l’asuntu, esgranamos l’orixe y les consecuencies d’esti modelu de xestión y qué alternatives plantegamos en consonancia col restu de persones que la integren.
En primer llugar, n’Asturies la central de La Pereda y la cementera d’Aboño tienen permisu pa la quema de CSR, consistente en basura seco y prensao. Esti procesu emite contaminantes tóxicos como dioxines, furanos, mercuriu y partícules fines y la ceniza espulsao contién material pesao que ye dañible pal suelu y pal aire. Amás, esti tipu d’industries suelen instalase en zones vulnerables y en riesgu de probitú, con poca cohesión social y tendentes a la contaminación. P’acabar, los accidentes nestes instalaciones traen consigo riesgos adicionales como fugues o esplosiones.
El verdaderu problema surde nel momentu nel que’l gobiernu actual, tres años colos proyectos d’incineración aparcaos, s’amuesa favoratible a la quema de talos materiales a pesar de toles contraindicaciones yá mentaes.
Sicasí, hai otros culpables acullá del gobiernu asturianu pa tener algamao esti puntu críticu: los conceyos, responsables del tratamientu de basura nel estáu. Los ayuntamientos de Xixón, Uviéu, Avilés, Gozón, Llaviana y Mieres formen, xunto al executivu central, el conseyu d’alministración de COXERSA, consorciu nel que los alcaldes delegaron dafechu les responsabilidaes na xestión de residuos, evitando asina una política llocal propia.
Una de les consecuencies d’esi conveniu ye que la tasa de reciclaxe n’Asturies, anque ye alta, mengua nel casu de les cases hasta un 23%, bastante pembaxo d’otros territorios como La Rioxa (66%) o Cataluña (57%). El cogollu del problema allúgase nel fechu de qu’esti procesu déxase nes manes de la planta de separación del vertederu, que nun tien como oxetivu final el reciclaxe, sinón l’atropamientu clasificáu de la basura, y acaben apostando por una quema industrial del residuu.
Dende Aína, siguiendo les idees y plantegamientos del Conceyu Contra la Incineración, consideramos qu’hai alternatives p’algamar el puntu de “residuu cero” al traviés de les 5R (reducir, reutilizar, reciclar, refugar y iguar). Pa ello, ye necesario ellaborar un plan de residuos modernu, inspiráu nel de les zones con tases de reciclaxe altes y con obligación de cumplimientu a nivel de país y de conceyos. Esti plan va sofitase sobro estos pegoyos:
1. Afalar al amenorgamientu del consumu, la reutilización y la torna.
2. Crear ciclos formativos especializaos.
3. Espander la recoyida selectiva.
4. Crear una normativa sobro la producción y diseñu de productos.
5. Fomentar la economía circular.
6. Invertir n’infraestructura pública de reciclaxe.
7. Realizar más auditoríes y siguimientos de la basura.