El partíu critica que la propuesta nueva nun solucione los problemes de contaminación y apoya les movilizaciones vecinales
L’Agrupación Llocal d’Aína en Xixón amuesa’l so «esmolecimientu y enfadu» pola decisión anunciada ayeri pol Ministeriu de Tresportes y Movilidá Sostenible en rellación al Vial de Xove. Dende l’agrupación denúnciase que «se pasa d’un modelu soterráu a un plan B que dixebra Xove con una autopista de cuatro carriles, creando otru focu de contaminación atmosférica y acústica, cuando la salida natural d’El Musel ye’l túnel d’Aboño».
El nuestru partíu considera qu’esta obra nació muerta pol sobrecostu y agora yá se pue calificar de «chambonada» lo que supón sacala alantre. D’esta manera, llamamos a sofitar les movilizaciones de la vecindá de la zona oeste de Xixón ―la primera d’elles, esti xueves 21 de marzu, a les 16:30 hores, na entrada d’El Musel, pel vial de Xove―, y pidimos al Ayuntamientu y al Principáu una respuesta contundente.
Amás, con esta decisión, amuésase una vegada más el despreciu que los distintos gobiernos españoles exercen sobre Asturies. «Necesitamos tener una voz propia y pesu políticu en Madrid que defenda los intereses del pueblu asturianu penriba de too», sorrayen dende l’Agrupación Llocal de Xixón. Por último, califiquen de «migayes» les alternatives que’l Ministeriu de Tresporte plantega pa «compensar la so incompetencia» y esixen que se dea respuesta a la parálisis que sufre la ciudá en proyectos dependientes del gobiernu español, como esti Vial de Xove, el Plan de Víes, el Solarón o’l Metrotrén.