Nel alcuentru espunxéronse idees pa fortalecer venceyos infraestructurales, culturales y económicos ente los territorios
Los partíos políticos Aína, Alantre y Extremeñistas aconceyaron el 27 d’abril en Zamora col oxetivu d’entamar un proyectu pal espoxigue del corredor ferroviariu de la Vía de la Plata, cola mira de favorecer la comunicación ente territorios venceyaos por motivos históricos y culturales y reclamar un modelu ferroviariu descentralizáu.
Coles mesmes, l’alcuentru valió pa tratar los retos comunes a los territorios a lo llargo la Vía de la Plata ―dende Asturies y el País Lleonés hasta Estremadura―, destacando la falta d’infraestructura, la inversión económica escasa y el despoblamientu creciente.
Estes formaciones nun escarten facer más alcuentros d’esti tipu nos que trabayen a comuña n‘iniciatives empobinaes a iguar los problemes de movilidá, despoblamientu y estancamientu económicu de los territorios mentaos, emponderando’l potencial de la Vía de la Plata como un corredor históricu clave. Amás, señálase la promoción de les llingües y cultures propies de caún como otru de los posibles ámbitos de collaboración.
Los tres partíos van facer por crear una llinia de trabayu confederal real dende les propies formaciones y non al traviés de proyectos políticos pensaos en Madrid, invitando a reforciar l’alianza d’izquierdes.