Olga Álvarez y Xabel Andrade, voceros del partíu ecoloxista, aconceyen con integrantes de la nuestra Mesa Nacional
Esti llunes, les representantes de Verdes Equo Asturies, Olga Álvarez y Xabel Andrade, acudieron a La Llegra (Uviéu) pa intercambiar paeceres colos miembros de la nuestra Mesa Nacional, Isabel A. Fernández, Óliver González y Marcos Rodríguez sobro’l modelu de País que queremos construyir.
Nesti alcuentru compartimos alderique y espaciu amigable y falemos de pasáu y futuru, de política, de les necesidaes que carez Asturies y de la intención de texer rede ente formaciones. L’averamientu tuvo marcáu pola empatía y la honestidá a la hora d’identificar los asuntos nos que nos asemeyamos y aquellos nos que les nuestres opiniones resulten estremaes.
Sicasí, un tema nel que s’algamó un puntu importante de converxencia ye la necesidá de xenerar fuercies polítiques que pongan el futuru d’Asturies nel centru, con un enfoque caltenible, feminista y verde. Dambes formaciones consideramos que la izquierda ha de ser quien a iguar los graves problemes que’l pueblu asturianu tien per delante, con una idea clara del país que queremos que seya Asturies pa poder, ente otres coses, puxar por que les xeneraciones próximes puean fincase nel territoriu.
L’aconceyamientu zarróse con sensaciones positives nes dos formaciones y el compromisu de siguir fortaleciendo los nuestros venceyos pa texer rede.