N’acabando la manifestación, entamamos un vermú na Caxa Músicos con un saludu políticu y música con DJ Ixuxú
L’asociacionismu anda dando les boquiaes nesti país onde siempre fuimos vanguardia n’autoorganización; en Llangréu, por poner, somos casi la metá de persones que fuimos. Munches nun creen yá nunos sindicatos que n’otru tiempu punxeron de rodiyes a la dictadura, y la mayoría la mocedá namás piensa n’emigrar como forma de vida. Hailos que piensen que la única solución ye renunciar. Que vengan multinacionales, dicen, a que-yos regalemos parceles y conexones viaries, a que faigamos lleis a la so midida, a que destruyamos el comerciu llocal, a que-yos perdonemos impuestos, a que renunciemos a los nuestros derechos sindicales, a que callemos pa recibir 100, 200 o 300 puestos de trabayu.
Si vives nes Cuenques Mineres, pue que más qu’en cualquier otru llugar del nuestru país asturianu, pue abultar qu’hasta tien sentíu. Hai un sentimientu de derrota que lleva instalándose ente la xente dende los años 90 como si fuere inevitable.
¿Pero yelo? ¿De verdá ye inevitable?
Les madres y padres de Llangréu nun van callar cuando-yos aumenten de manera arbitraria un 60% el preciu d’un serviciu públicu como’l comedor escolar. Les vecines de L’Entregu organizáronse espontánemente pa que nun-yos piesllen el cementeriu, en defensa del so derechu a visitar a la familia que tienen descansando ellí. Les Seis de la Suiza lleven tiempu deprendiéndonos que facer sindicalismu nun ye delitu. Surdieron o tán surdiendo uniones ganaderes, sindicatos agroecoloxistes, una nueva intersindical. El feminismu ye acaldía más fuerte, más implantáu y más inclusivu.
Nel mundu d’anguaño, onde los recursos son llendaos y la crisis climática pide aiciones concretes, ye imprescindible replantegar el nuestru modelu productivu. N’Asturies, tierra de naturaleza y trabayadores, tenemos la oportunidá de ser pioneros nun camín hacia’l decrecimientu intelixente. Esto nun significa reducir el nuestru bientar, sinón tolo contrario: ye una apuesta por una economía más equitativa y sostenible que respete los nuestros recursos y busque un futuru más prometedor. Enfocándonos n’industries que valoricen la calidá más que la cantidá y que prioricen el bientar comunal y l’equilibriu ambiental, podemos construyir una Asturies moderna y caltenible pa les xeneraciones futures.
Estos brotos nuevos d’autoconciencia y contestación social, ambiental, sindical y, en definitiva, política tán teniendo yá un efectu nos sindicatos y partíos que tovía son mayoritarios. Tán dándose cuenta, magar que tímidamente, más con palabres que con fechos, que’l futuru pasa por poner nel centru a Asturies, a los y les trabayadores asturianes.
P’Aína, un partíu feminista, soberanista y d’izquierdes que ta equí pa eso mesmamente, p’asturianizar la política, too esto ye motivu pa festexar esti primeru de mayu de 2024. Vamos siguir lluchando con más fuercia entá pa que más y más asturianes y asturianos vean que’l nuestru presente y futuru nun ye cosa d’individualidaes sinón que ta nes nuestres manes, nes nuestres lluches, xuntes como clase obrera y como comunidá humana. Ye asina como vamos consiguir un país d’igualdá y xusticia, un país onde les nuestres fíes quieran y puedan quedar a construyir un proyectu de vida digna.
Pola llibertá, la igualdá, la solidaridá y la xusticia. ¡Puxa la clase obrera! ¡Puxa Asturies!