El vienres 25 de setiembre inauguremos el primer Llar d’Aína, n’Uviéu, na cai San Pedro Mestallón, 11. Foi un actu con muncha xente que valió p’alcontranos con toles que punxestis el vuestru sofitu económicu.
La música vieno a lo llargo del tol actu colos sones electrónicos de raigañu y conciencia social de Fañagüeta Dj, mentanto s’enllenaba l’espaciu, y recibióse a les presentes con productos del país.
L’actu entamó con una presentación per parte de dos compañeres de la Executiva y la entrega de les recompenses del crowdfunding p’abrir l’espaciu, gracies al puxu vuestru.
Pa finar, Sofía Castañón fexo una entrevista sobre la situación política d’Asturies al nuestru voceru nacional, Iyán González, que diremos asoleyando perequí nos vinientes díes.
Naguamos por abrir, xuntes, munchos llares más.
¡Hai espaciu pa un Polu Políticu Asturianu!
¡Hai camín xuntes!
