El 8S d’esti añu en Mieres foi un día históricu p’Aína Asturies. Arrinquemos cola I Asemblea Nacional del partíu, onde votamos la nueva Executiva d’Aína Asturies y el primer Conseyu Nacional que van ser los encargaos de guiar la formación hasta 2029.
Darréu, tuvimos un actu políticu, col títulu Un polu p’Asturies, un pasu alantre, nel que participaron un númberu guapu d’organizaciones amigues.
Al entamu, compartieron les sos reivindicaciones les compañeres de la Intersindical Asturiana, Muyeres Pachamama, ADAE y el Sindicatu d’Inquilines d’Asturies.
De siguío, faló’l nuestru compañeru Iyán González, nuevu Voceru Nacional d’Aína. Nel discursu fixo un llamáu a toles organizaciones sindicales y sociales asturianes pa convocar una gran movilización pola convivencia, pola igualdá y a la contra de los discursos d’odiu.
Siguimos con una mesa redonda, moderada por Aique Iglesias, de la Executiva. Nella intervinieron Xabel Andrade del Partíu Verde d’Asturies, Ana Anaia de l’Agrupación d’Electores de Samartin, David Suárez “Cai” de Compromisu por Ḷḷena y Natalia González de Faciendo Morcin.
A lo último, el conciertu de Rubén Bada punxo’l ramu a esti actu reivindicativu col qu’Aína abrió’l ciclu políticu tres el branu.
Gracies a toles organizaciones amigues, a toles afiliaes y afiliaos, inscrites y demás persones que punxeron el so granín pa que la xornada d’ayeri fora inescaecible.
Xuntes, vamos siguir trabayando pa construyir un polu políticu p’Asturies.
