El pasáu 5 de marzu tuvimos en La Revoltosa mui bien acompañaes. Na selmana del 8M queríemos facer un actividá que nos sirviere pa reflexonar y formanos sobre la necesidá d’espacios d’organización pa les muyeres, y tuvimos la suerte de que La Güestia Roller Derby y La Muyerada respondieren al nuestru convite.
A lo llargo de casi dos hores falamos de los contestos que lleven a les muyeres -y otres persones con identidaes disidentes – a entamar colectivos propios. Tamién del derechu al deporte, del síndrome de la impostora, de los mecanismos pa crear espacios seguros… P’acabar compartiendo impresiones sobre’l movimientu feminista na actualidá y sobre les torgues y necesidaes a nivel institucional pa favorecer llugares d’alcuentru y creación non masculinos.
Queremos volver a agradecer a La Muyerada y a La Güestia que nos prestaren el so tiempu pa facelo posible. Tamién a Muyeres Pachamama, qu’anque nun pudieren participar por imprevistos d’última hora, respondieron al nuestru llamáu. Esperamos poder alcontranos con elles mui pronto. P’acabar, gracies a la Llibrería Café La Revoltosa por cedenos un espaciu tan prestosu y tratanos cola mayor amabilidá.
Y a tola xente que vino a compartir esti espaciu con nós y a participar nel alderique final, ¡gracies! Esperamos que vos prestare tanto como a nós.