El pasáu martes, representantes d’Aína caltuvieron un conceyu presencial col Sindicatu Ferroviariu pa conocer en profundidá la situación real del serviciu de Cercaníes n’Asturies. Nun alcuentru que la organización valora como mui positivu, pudimos escuchar cuála ye la visión de los profesionales que conocen el día ente día del ferrocarril.
Escuchar pa entender
P’Aína, ye fundamental recoyer la voz de los y les trabayadores del sector. Ellos y elles son quien meyor conoz les necesidaes materiales, humanes y lloxístiques que presenta anguaño la rede ferroviaria asturiana. Al traviés del so testimoniu, pudimos comprobar les carancies estructurales qu’arrastra’l serviciu, pero tamién les oportunidaes de meyora qu’esisten de cara al futuru.
Una visión compartida
Ún de los puntos más destacaos del alcuentru foi la coincidencia plena na necesidá de convertir les Cercaníes na exa vertebradora del territoriu asturianu. Compartimos col Sindicatu la visión de qu’un serviciu ferroviariu modernu, eficiente y accesible ye clave pa garantizar la cohesión territorial, facilitar la movilidá sostenible y afitar población nos distintos conceyos d’Asturies.
Prioridá política
Dende Aína tenemos claro que ye imprescindible asitiar esti serviciu nel centru de les prioridaes polítiques. Nun podemos permitir que les Cercaníes sigan siendo l’asignatura pendiente del tresporte n’Asturies. Ello esixe non namás inversiones, sinón tamién una planificación estratéxica que tenga en cuenta les necesidaes reales de la xente y de quienes faen posible el serviciu.
Compromisu
Agradecemos al Sindicatu Ferroviariu la so disposición, el tiempu dedicáu y la so disposición pa contanos la realidá ensin filtros. Queda enforma trabayu per delantre, pero esti tipu d’alcuentros contribuyen a diseñar propuestes axustaes a lo que realmente precisa’l ferrocarril asturianu.
Aína va siguir trabayando y escuchando a los axentes implicaos pa construyir un modelu de Cercaníes a l’altor de lo qu’Asturies merez.