Esto ye lo que nos prestaría que fuera… pero nun ye la realidá de la vivienda n’Asturies
La vivienda ye ún de los problemes que más preocupen a los asturianos y asturianes y nun ye pa menos: alquileres elevaos, dificultá pa poder comprar la primer vivienda…. En concreto, según el portal Idealista, los precios del alquiler xubieron un 9,6% nel últimu añu y un 17,4% los de compraventa d’inmuebles. L’alministración tien que garantizar l’accesu a una vivienda digna y adecuada. Y anguaño, esto nun ye posible, ni muncho menos, pa toles asturianes y asturianos.
Estos precios vense influyíos por munchos factores pero ún de los que más destaca anguaño ye l’alquiler de temporada, que desvía parte del parque de la vivienda a alquileres vacacionales de cortu plazu, onde l’arrendatariu saca mayor beneficiu a costa de la dificultá de consiguir una primer vivienda pa otra parte de la sociedá. Asina, nel casu d’Asturies según l’estudiu “Panorama actual de las viviendas turísticas en Asturias” d’Ana Salomé, en mayu de 2025, Asturies contaba con 7.697 viviendes turístiques, un 58% más que nel mes d’agostu de 2020. Amás, superaba con esto la media nacional, lo que vien a reflexar una intensificación d’esta tendencia n’Asturies, viéndose en mayor midida afeutaos conceyos como Llanes, Cangues d’Onís, Caravia o Ribedeva, que se convierten en “destinos turísticos con una alta densidá de vivienda turística sobre’l parque residencial”. Y estos son los datos declaraos, a los qu’habría que sumar los pisos turísticos illegales.
Si vamos a les fontes oficiales, y centrándonos nel conceyu d’Uviéu, les cifres van nel mesmu sentíu. Dende que l’INE ofrez datos, esto ye, dende agostu del 2020 y hasta mayu del 2025, la vivienda turística n’Uviéu medró un 92,3%, mientres que’l númberu de places ufiertaes fízolo nun 105,5%. Amás, yá supón un 0,76% del total de la vivienda censada na ciudá, datos que tán penriba de los rexistraos en Madrid (0,63%) o Barcelona (0,7%).
En cuantes a la construcción de vivienda nuevo, al pieslle del añu 2024 visárense n’Asturies 2.453 d’elles, lo que suponía una medra del 66% respeutive al añu anterior. Uviéu, con 723 viviendes, yera’l conceyu que mayor actividá rexistraba nesti sen. D’otra banda, y según datos pertenecientes también al 2024, Uviéu sumaba unes 20.000 viviendes vacíes.
Pa rematar con otru datu bien significativu, les cifres más recientes sobre compraventa, recoyíes na Estadística de Transacciones Inmobiliarias del Ministerio de Vivienda, indiquen que’l 12% de les compres de vivienda realizaes n’Asturies ficiéronles persones residentes en Madrid.
Lo que tenemos claro dende Aína, ye que la vivienda ye un derechu, y polo tanto, nun debería ser un mediu p’arriquecese unos pocos. L’alministración tien que facer polítiques de vivienda, y non política inmobiliaria basada nes “necesidades” del mercáu. Esto ye, hemos centranos en dotar a la xente de recursos pa meyorar l’accesu a la vivienda, ensin arriquecer a los mesmos de siempres.
Ta claro que nun hai una sola respuesta correuta, pero sí qu’hai polítiques que s’averen más a les necesidaes sociales reales de la xente. Nel casu d’Aína les propuestes van nes siguientes llinies:
Regulación del mercáu del alquiler:
- Blindar el preciu de los alquileres, llendándolos al IPC. Non a la especulación.
- Reformar l’índiz de precios en función de la renta media, non de los precios de mercáu.
- Ufiertar ayudes al alquiler con regulación específica pa evitar la xuba de precios que n’otres ocasiones vinieron asociaes a estes propuestes.
- Aumentar los impuestos a los grandes tenedores y propietarios de pisos turísticos.
Movilización de viviendes vacíes:
- Crear un serviciu que dea garantía tanto a inquilinos como propietarios, ensin que’l beneficiu de los segundos seya’l fin mesmu. L’oxetivu ha ser da-y usu a la vivienda esistente con condiciones dignes.
- Afitar un impuestu progresivu a les viviendes vacíes, especialmente a les de grandes fondos d’inversión.
Construcción de nueves viviendes sociales:
- Blindar la so venta, creando un parque de vivienda público n’alquiler estable y que contemple sanciones a la especulación con estes viviendes.
- Estudiar y favorecer soluciones de construcción o remocique cooperativu nes que la propiedá quede supeditada al usu de la vivienda.
Ayudes a la compra de vivienda nueva:
- Entamar una reforma fiscal pa bonificar la vivienda habitual.
Vivienda turística
- Llendar los pisos turísticos nes zones tensionaes. Afitar cupos per llocalidaes, priorizando l’usu residencial.
- Aumentar el control de la llicencia obligatoria y de los pisos turísticos illegales.
- Implementar impuestos turísticos pa reinvertir en programes de vivienda social.
Pero nun se trata solo de promover la construcción de pisos nuevos o impulsar polítiques d’alquiler pa que s’habiten los pisos vacios. La solución pasa también por tener un serviciu públicu de vivienda qu’amás de tener un parque públicu d’alquiler estable y asequible, ufierte propuestes de carauter social como:
- Protección al inquilín frente a desahucios, moratoria permanente cuando nun hai alternativa habitacional, acompañamientu social y mediación pública énte alzamientos xudiciales o garantía d’alquiler social obligatoriu pa entidades financieres y grandes tenedores en casos de impagu por vulnerabilidá.
- Que tenga un observatoriu públicu de vivienda, con datos reales sobre precios, oferta y demanda y usu de les viviendes, amás d’un portal de tresparencia na xestión del suelu públicu.
- Bolsa pública de vivienda n’alquiler, onde se puedan ceder los pisos a cambiu de xestión y garantía (pagu de seguros, mantenimientu…) contratu a inquilinos y arrendatarios, sobre too cuando se proponen collaboraciones público-privaes.
Toes estes propuestes han llevar emparexáu un cambiu na visión social de les polítiques de vivienda. Aína, como partíu políticu asturianu, entiende que la vivienda ye UN DERECHU UNIVERSAL Y NON UN NEGOCIU.
