L’actu, al que van asistir representantes de sindicatos y consumidores, va celebrase’l proximu vienres 10 de mayu en Sama
El próximu vienres 10 de mayu, a les 18:30, na Casa Cultura Escueles Dorado de Sama (Llangréu) va desendolcase la mesa redonda que tien por títulu “¿Y si la Cuenca’l Nalón tamién sube al tren?” na que se va analizar l’estáu actual de la rede de cercaníes ferroviaries del valle’l Nalón y los oxetivos qu’esta rede tien qu’algamar pa convertirse nun estímulu socioeconómicu auténticu de la comarca minera.
L’actu, entamáu pola agrupación llocal d’Aína, va cuntar cola participación de la secretaria de Comisiones Obreres del Nalón, Esther Barbón, el presidente de la Unión de Consumidores d’ Asturies, Dacio Alonso y, tamién, el representante del Sindicatu Ferroviariu d’Asturies y miembru de la Intersindical asturiana, Andrés Nicieza.
La tertulia, abierta al públicu, va desendolcase al traviés de cuatro bloques temáticos al rodiu los que los tres ponentes van intercambiar datos y idees. Nel primeru va facese un diagnósticu de la situación actual de la rede ferroviaria de cercaníes; nel segundu tramu van proponese midíes a curtiu y mediu plazu pa meyorar y da-y vuelta a la situación; el terceru va tratar los beneficios socioeconómicos que tendría pal valle’l Nalón una rede ferroviaria moderna y eficiente. P’acabar, el cuartu bloque va abrir un alderique que va permitir interactuar a los tres ponentes col públicu pa tratar de responder a entrugues que puedan dir surdiendo a lo llargo la xornada.
Con esti eventu, l’agrupación llocal d’Aína anima a los vecinos y les vecines del Nalón y al texíu asociativu a participar pa poder siguir avanzando na reclamación d’unes cercaníes ferroviaries dignes, modernes y eficientes que meyoren la vida y la economía de les vecines y de los vecinos d’esta comarca minera.