Una d’elles va analizar los problemes nos comedores de los servicios públicos y la otra va dedicase a los recursos d’atención a muyeres
Dende Aína siguimos creando Comisiones de Trabayu p’afondar en cuestiones concretes y desendolcar campañes, propuestes, informes o postures alredor d’elles. Una ta dedicada a los recursos d’atención a muyeres y otra, a los comedores de los servicios públicos. Pue participar nelles cualesquier persona afiliada o inscrita a Aína.
Apurrimos más información de cada comisión:
¿Cuántos recursos d’atención a muyeres esisten nel nuesu país? ¿Son suficientes? ¿Son competencia de los conceyos o del Gobiernu d’Asturies? ¿Qué trabayos faen? ¿Hai bastantes profesionales? La Estaya de Feminismu y Derechos Sociales va trabayar estes cuestiones na Comisión sobre Recursos d’Atención a Muyeres n’Asturies y toles militantes qu’asina lo deseyen tán convidaes a participar nella respondiendo al nuestru corréu o accediendo al grupu de Whatsapp mentáu nél.
Cuntamos con vós pa participar nesta Comisión, que va entamar esta selmana, y trabayar por un partíu y una Asturies feminista, que nun dexe a naide atrás.
Énte la quiebra de la empresa que daba’l serviciu a esta escuela, la conseyería encargábalu a otra que-yos subía’l preciu’l menú a más de 8 euros. Les families namás piden una cuantía razonable, que nun s’especule cola alimentación de les sos fíes y fíos nun centru públicu.
N’Aína consideramos que la manera de dar de comer nes escueles, hospitales y residencies de mayores asturianes tien munchu percorríu por facer, aprovechando espacios y recursos de cercanía y emplegando a trabayadores en condiciones xustes.
Dende esta nueva comisión queremos escuchar a usuaries y profesionales y facer una propuesta ambiciosa. Animámosvos a participar a traviés del grupu de Whatsapp habilitáu.