Toles muyeres afiliaes, inscrites o simpatizantes del nuestru partíu tán convidaes a un alcuentru na plaza’l Paragües d’Uviéu
La Estaya de Feminismu y Derechos Sociales d’Aína entama’l primer Vermú Feminista del partíu esti vienres 29 de marzu a les 12:30 na plaza’l Paragües (Uviéu). A esti alcuentru informal tán convidaes toles muyeres que componen el partíu, dende les afiliaes hasta les inscrites, pasando per toes aquelles simpatizantes que quieran conocer meyor el nuestru proyeutu. Por supuestu, toles collacies, familiares y acompañantes van ser recibíes colos brazos abiertos.
Nesti eventu, les muyeres d’Aína vamos conocenos, compartir tiempu de calidá y intercambiar opiniones no que cinca a la militancia y les esperiencies vitales demientres tomamos unos vasos nun ambiente afayadizu. Esta oportunidá va permitir poner enriba la mesa temes que tristemente nun siempre tienen l’espaciu que merecen nos alderiques diarios.
Nun se tien previstu nengún aforu de participación, pero sedría conveniente unviar un mensaxe d’asistencia peles nuestres redes sociales (Instagram preferentemente) o per corréu electrónicu (ainaasturies@gmail.com). En casu de tener reciella a cargu, va intentase que l’alcuentru seya un espaciu conciliador y adautáu a les necesidaes de toes.
Anímate a faer camín con nosotres por una Asturies feminista, soberana y xusta.
#EnsinNosotresNunHaiCamín