Dende’l partíu deféndese una agricultura y ganadería sostenibles que reanimen el mediu rural asturianu
Aína asoleya un comunicáu en defensa del mediu rural asturianu y en solidaridá con munches de les reivindicaciones amosaes nos últimos díes poles organizaciones del sector agrariu asturianu. La formación política asturianista d’izquierda defende una ganadería y una agricultura productives, sostenibles, de cercanía y que xeneren emplegu como única receta pa devolve-y la vida al mediu rural y pa xenerar un texíu económicu que vertebre Asturies.
D’esta manera, plantegamos que la ganadería y agricultura tengan un calter estratéxicu na planificación socioeconómica asturiana: per un llau, como elementos vertebradores del territoriu; per otru, como caltenedores del paisaxe asturianu y, arriendes d’ello, como fonte primera de produción de recursos alimentarios pa la población.
Poro, p’atopar soluciones al conflictu, lo primero ye da-y el pesu qu’amerita’l sector y esclariar que l’alministración asturiana tien que poner tol enfotu posible en caltener, vixilar y facer medrar la industria agroalimentaria de forma integral. L’Asturies del futuru, a mediu plazu, tien que tener como oxetivu aumentar progresivamente la so soberanía alimentaria y, pa ello, ye mester facer una apuesta seria pola industria agroalimentaria de cercanía, de calidá y que-y da riqueza al rural en tolos aspeutos: social, económicu, paisaxísticu, etc.
Amás, sorrayamos que lo público tien de ser clave a la hora de poner sobre la mesa de comedores escolares, sanitarios y residenciales, asina como nos espacios llaborales, productos del país.
D’último, dende Aína plantegamos una política agraria que s’oriente hacia’l caltenimientu de les
pequeñes esplotaciones agroganaderes y hacia los pequeños productores asturianos y denunciamos el fechu de que l’actual PAC tea desendolcada dende una perspeutiva globalizaora y de llibre mercáu que nun tien en cuenta los condicionantes del entornu xeográficu.
Amás, facemos un llamáu a que’l pueblu asturianu amuese la so solidaridá coles productores del sector primariu y desiximos l’ameyoramientu de la Llei de la Cadena Alimentaria, garantizando la rentabilidá y finando cola competencia deslleal y l’arriquecimientu de les grandes corporaciones. Ye inxusto que los productos asturianos y de cercanía, tengan que competir con otros que se producen ensin normatives nin llaborales, nin sanitaries, nin mediuambientales que nun garanticen la mesma calidá del productu y que, amás, va faciéndonos cada vuelta más esclaves y dependientes de los xuegos del llibre mercáu y de les macrocorporaciones en materia d’alimentación.
L’oxetivu últimu ye, con too y con eso, algamar soluciones partiendo del trabayu directu cola xente del seutor, fomentando la cooperación de pequeñes productores, y sintiendo les reivindicaciones de les sos organizaciones.
Responder