La Estaya de Feminismu y Derechos Sociales entama una mesa redonda pa poner en valor les vides reales.
El 20 d’ochobre, dempués de la concentración de tolos años por una Asturies ensin blanqueamientu a la monarquía, va haber un actu a les 20h nel Llar La Llegra, Uviéu, pa celebrar y reivindicar a toles muyeres rurales del nuesu país y tamién a les de too’l mundu.
Nel actu participarán Lena Sarasúa, ganadera asturiana, y Sara Álvarez Medrano, maya k’iche’ de Guatemala y terapeuta social, y falarase de la situación y la hestoria de les muyeres rurales n’Asturies y n’América Llatina, pa poner en común idees y vivencies que nos afeutan a toes.
Dende Aína creemos que hai que revalorizar el trabayu que les muyeres faen nel nuesu rural y que está sobre manera invisibilizao. Amás, ye perimportante mirar más allá de les nueses fronteres y conocer otres maneres d’habitar el mundu, con otres dinámiques y otros tiempos, pues ye enriquecimientu cultural y tamién porque hai muyeres d’otros países trabayando nel nuesu rural. Al final del actu, habrá tiempu d’alderique pa conversar coles ponentes y poder tar nun ambiente más distendíu.
Poro, invitámosvos a participar nesti actu el vienres a les 20h, nel Llar La Llegra, cai del Postigo Bajo, 4, Uviéu.
Responder