Compañeres y compañeros, amigues y vecines de Mieres y d’Asturies entera.
Enantes de nada, quixere dar les gracies al piñu de militantes que fexo por organizar esti actu, al conceyu de Mieres por cedenos les sos instalaciones y a toles que tais güei equí con nós. Falo d’organizaciones que tán con nós nesti día, como Anticapitalistes y Podemos; del Sindicatu Vivienda, militantes que desendolquen una de les lluches más necesaries d’esti tiempu que nos toca vivir: la defensa del derechu a un sitiu dignu onde facer llar. Falo de les espresiones feministes de la Cuenca del Caudal y la Cuenca del Nalón, que siguen dando tira y faciendo rescamplar l’horizonte hacia onde la igualdá tien de siguir espurriendo. Falo de les organizaciones sindicales, como la Intersindical Asturiana coles que tenemos que siguir en contactu porque son les que conocen lo que pasa acaldía nos centros de trabayu onde ta’l valor más importante d’esti pueblu: la so xente. Falo, tamién, de la plataforma contra la quema de CSR, la xente que llucha pola calidá del aire que güei respiramos equí, nesti parque, y que queremos que siga siendo ún que nun nos envelene, que nos permita vivir nes villes d’Asturies ensin que la basoria se xestione a golpe de quemador en La Perea y, de l’atmósfera, pa los nuestros pulmones. Tamién tán equí compañeres migraes, de Muyeres Pachamama, que texen llazos de solidaridá ente quien llega y quien, tamién, sabe lo que ye que los fíos y fíes marchen. Y falamos de les organizaciones que lluchen por caltener les llingües y la cultura d’Asturies y que güei tamién tán equí nesti 8 setiembre. Pola defensa de la memoria histórica del asturianismu, d’esi Movimientu 25 de mayu, y d’otros colectivos sociales que tamién nos acompañáis.
Bonos díes a toes y toos. ¡Qué bien se ta güei na villa de Mieres! Tase bien porque tenemos la compañía, nesti día tamién, de representantes que dominen perbién lo que pasa nos sos conceyos y que quixeron romper la baraxa y facer política dende ellos, al marxe de los grandes partíos y les sos dinámiques sucursalistes. Un saludu a la xente que ta güei equí de Faciendo Morcín, de Compromisu por L.lena y de l’Agrupación d’Electores de Samartín. Y fino con esta ronda, agradeciendo tamién la presencia del Partíu Verde d’Asturies, col que llevamos munchu tiempu de sintonía trabayada en conceyos nos qu’esponemos les nuestres visiones sobre l’Asturies que queremos. Cuntamos cola so presencia y la nuestra confianza pa poder siguir diseñando un futuru meyor a comuña.
“Nun son bonos tiempos pero ye cosa nuestra que seyan meyores.“
Cuando entamamos con esti proyeutu que se llama Aína hebo xente que nos dixo “nun son bonos tiempos”. ¿Pero cuándo lo fueron? Nesta tierra, nesti país asturianu, encadenamos crisis tres crisis: económiques, sociales y culturales, que nos dexen ensin derechos sociales nin soberanía sobre lo que pasa nesti suelu que pisamos. De la llarga nueche del franquismu y la reconversión qu’ellí yá nos llantaron, a la transición democrática que se convirtió nuna transacción de lo público pa lo privao, mentanto los privilexos de sangre azul de les élites siguieron intactos. De la especulación cola vivienda de los 90 al crack de 2008 que nos llevó a los retayos más brutales de la hestoria, que valieron hasta pa quitar les calefacciones nes escueles mentanto s’echaba a la xente de les sos cases, que quedaben en manes de bancos a los que se rescataba mentanto se dexaba a les families ensin nada. Qué dicir d’esti momentu: dícennos que se recuperen los trabayos perdíos na postrera crisis pero apaez un fenómenu nuevu: el de les trabayadores probes, que nun puen llegar a fin de mes. Quien va a trabayar tolos díes sabiendo que pierde. La carestía de la vida y, especialmente, el drama d’una vivienda que ta equí, alredor, pero en manes de quien terceriza la economía, que nos conderga a un turismu masivu, invasivu, malu pa quien vien y malu pa les persones que quedamos. Una vivienda, dicía, en manes de fondos especuladores como de xuru tenemos equí a pocos metros. Y sabémoslo porque cuando Aína fexo apocayá una campaña en defensa de la vivienda digna con unes valles publicitaries reivindicatives…¡poníense en contactu con nós fondos d’inversión de fuera d’Europa pa mercar les presuntes viviendes a preciu y condiciones dignes que nós, como protesta, ofrecíemos.
Nun son bonos tiempos pero ye cosa nuestra que seyan meyores. Mirái, Aína naz d’una idea que yá repitimos munches vegaes: la de la orfandá política. La de la falta de continuidá d’un proyeutu políticu que nos llegare hasta güei nes cais pero, tamién, nes instituciones. Fixáivos, hai poco más de 50 años nacía l’asturianismu modernu. Un grupu de persones de toa Asturies afitaron los pies y dixeron qu’equí había un país, una cultura, unos derechos históricos qu’había que defender nel marcu de la defensa de les llibertaes civiles democrátiques. Fixéronlo, entá, en plenu franquismu y frutu d’ello foi la primer movilización llegal de la transición: una manifestación histórica qu’estes últimes selmanes cumplía 50 años y que demandaba l’asturianu nes escueles y l’autonomía. Esta Asturies que tenemos güei pudo nun ser. Cenciellamente, pudimos nun llegar a tener siquiera esta ruina autonomía que padecemos en forma de “principáu”, cola nuestra tradición republicana, como decoráu pa que la monarquía venga a retratase una vegada al añu. Debemos muncho a aquella xente que nos 70 garró la base histórica y material d’Asturies pa proyectar una tierra con voz propia; a Conceyu Bable que, por cierto, tuvo nes cuenques y especialmente en Mieres un gran puxu qu’hai que reconocer. Fixáivos si siguimos teniendo qu’estudiar la nuestra historia con un poco más d’autoestima, qu’inda güei tamos viendo cómo apaecen documentos onde va casi un sieglu, nos años trenta y enantes d’entamar la dómina más escura, yá se pensaba y diseñaba una Asturies con estatutos y, por cierto, muncho más soberana en dellos aspeutos de lo que ye anguaño.
“Asturianizar la política ye falar de les coses que pasen equí, al llau, y que condicionen lo que vivimos acaldía.“
N’Aína nun vemos mesiánicamente la política asturiana. Nun xugamos a inventar nada nin a facenos los salvadores: al aviesu. Queremos reconocenos en toes y caúna de les lluches que vienen desendolcándose n’Asturies nes últimes 5 décades pa da-y cuerpu y coherencia ideolóxica a un modelu de país meyor. Y ye que, si miramos alredor d’Asturies, nun hai tierra que nun tenga una espresión política propia nes instituciones. Tiénenla les gallegues, los llioneses, van tenela en Cantabria y tiénenles, de munches maneres, nel País Vascu y Navarra, en distintos formatos. Hailes n’Aragón ¡menudu chuntazu! y tamién en Cataluña, el País Valencianu y les isles, pa tolos gustos. Tamién n’Andalucía, onde vemos con empatía cómo les izquierdes volvieron la vista pa mirar pal so propiu país, en cuenta de tanto mirar al norte, y avancen como pueblu organizáu. Hai hasta organizaciones territoriales pensaes, por una vegada, namás pa Madrid.
Pero, amigues, nós queremos siguir tirando d’esti filo azul que naz en Conceyu Bable y qu’espurre hasta güei. Queremos dar tira a una idea que pretende algamar la meyor versión d’Asturies. Por eso, nestos últimos 3 años llargos dende que nos constituyimos, venimos falando de la importancia d’asturianizar la política. ¿Pero qué ye asturianizar la política? Ye falar de les coses que pasen equí, al llau, y que condicionen lo que vivimos acaldía. Ye falar de les cifres de la economía asturiana, del paru y de la calidá llaboral, de los presupuestos de los conceyos, de qué polítiques de sanidá o enseñu se faen. Ye dicir que nun necesitamos universidaes privaes, nin conciertos educativos, nin hospitales de raigañu madrileñu: necesitámoslos públicos y de calidá. Ye poner equí’l centru de l’acción política y facer alcordanza d’aquel “piensa global actúa llocal”. Ye, a la fin, apagar les televisiones de Madrid -y el so ruiu centráu na manipulación y l’odiu- y falar del preciu de la vivienda nel to barriu, de que nun somos quién a facer de la FEVE un Asturtrén que nos vehicule como país, de la falta d’espacios verdes nunes ciudaes onde yá nun somos a tar nes sos cais coles foles de calor y tantu cementu de los Masavéu. Asturianizar la política ye dicir a les clares qu’Asturies nun pue importar la inmensa mayoría de los alimentos que consumimos mentanto vivimos arrodiaos d’un mediu natural onde podemos producir muncho de lo necesario pa poner na mesa de la cocina tolos díes, garantizando la xusticia ambiental y llaboral. Asturianizar la política ye poner a la Xunta Xeneral a llexislar con autoestima, demandar la capacidá de decisión sobre toles coses que nos importen y que queden tapecíes nos debates interesaos que xeneren discursos d’odiu como los que tamos viendo apocayá. Asturianizar la política ye emponderar el papel de les villes d’Asturies, d’occidente a oriente, que tienen de tar vertebraes con un tresporte públicu de verdá. Ye, tamién, entender qu’hai sectores productivos que n’Asturies arrenunciamos a poner en valor, como cola cultura y les artes, col mayor de los autoodios, colos que podríemos facer palanca pa vivir meyor y organizar la economía al nuestru favor. Y eso, n’Aína, querémoslo. Y por ello vamos lluchar nestos 9 meses que queden hasta mayu de 2027.
“Aína va proponer dende mañana mesmo a toles organizaciones sociales y sindicales d’Asturies la convocatoria d’una gran movilización pola convivencia, la igualdá y a la escontra de los discursos d’odiu.”
Pero nun queremos nin podemos facelo en soledá. Nel últimu Congresu de la organización aprobamos una idea, un marcu estratéxicu: la conformación d’un Polu Políticu Asturianu pa 2027. Y nello tamos. Sabemos qu’esiste un sentir asturianista na población, muncho más allá de lo que representa o hasta onde espurre orgánicamente Aína. Sabémoslo y préstanos porque fainos abrir campu y mirar a los güeyos a les asturianes y asturianos. Notámoslo nes interacciones polítiques y sociales en curtio, vémoslo no que dicen los enemigos d’Asturies, enfotaos siempre en facer política contra la nuestra cultura. Si tan poco importa, si tan pa poco val políticamente lo asturiano, el sentir polo propio… ¿por qué s’enfociquen tanto esos espantayos de la estrema derecha con cualquier noticia onde se vea dignificada una migayina la nuestra identidá? ¿Por qué echen tantes hores en facenos de menos, llamanos aldeanos, atacar a la cultura propia y odiar lo que nos reconoz?
Ye más, n’Aína non solo ye que queramos asturianizar la política pa facela más xusta pa la mayoría social: ye que fiximos una carauterización fonda del fenómenu de la estrema derecha española y, tamién, conocemos cómo se combate. Y equí, compañeres y compañeros, tenemos qu’usar l’asturianidá a favor de la democracia real y la convivencia, frente a la política del odiu, de les banderes franquistes, del insultu y l’ataque en redes a toes aquelles persones d’izquierda, o feministes, o migrantes, o sindicalistes, o defensores de les llingües y cultures, o contra les que defenden la llibertá pa ser y vivir como más nos preste. Ye más: queremos facer un llamáu güei equí. Aína va proponer dende mañana mesmo a toles organizaciones sociales y sindicales d’Asturies la convocatoria d’una gran movilización pola convivencia, la igualdá y a la escontra de los discursos d’odiu nesta tierra que tien una identidá que nun van ser a borrar: la de ser solidaria, cuidar y acoyer a tol mundu, arimando’l llombu pa con quien ta un poco peor que tu, pa que dexe de talo. Tres d’eses banderes sí nos van ver y non p’agredir al cercanu y a les que vienen. Nesos mínimos de defensa de los derechos humanos tenemos que nos apautar yá. Queremos alcontranos nes cais nuna movilización proactiva y sabenos munches más. Porque lo somos.
“N’Aína negámonos a mercar el marcu ideolóxicu del mieu a dalgo muncho peor.”
Pero nun podemos arrenunciar a imaxinar un futuru meyor y ser críticos colo que yá tenemos equí, ensin que gobierne la derecha estrema.
Entendemos qu’esiste un riesgu evidente a que’l sistema políticu d’Asturies torne a ser dalgo paecío a lo que conocimos a entamos del sieglu XXI: un espaciu de la derecha, qu’agora ruempe en dos candidatures que na práctica van de la mano y un espaciu del centru-izquierda que funciona tan solidariu que yá anuncia hasta candidatures conxuntes nes circunscripciones oriental y occidental y promete investidura, presupuestos y gobiernu ensin definir, siquiera, la composición de les sos coaliciones. Dan igual los programes electorales porque, a la hora de la verdá, les soluciones vienen propuestes dende Madrid. Si toca guerra ya industrialización de cañones: suelu públicu a disposición. Si toca abrir la puertona a les universidaes privaes, alantre. Si toca pasar de puntiyes énte les muertes nuna mina de Zarréu, y dígolo col corazón nun puñu equí, nesti valle mineru nel que fui escolín de neñu, pasen. Si tenemos que dexar que la enésima multinacional que nun produz, sinón que distribúi, s’implante a coste cero nel país, tira que llibres. Si la vivienda va ver otra llexislatura igual, mentanto s’implementen planes que vienen d’otru tiempu y nun valen p’aliviar la necesidá d’un sitiu onde crear un llar… da lo mesmo.
Non. N’Aína negámonos a facer casu a les campañes de pressing que yá tamos viendo venir, a mercar el marcu ideolóxicu del mieu a dalgo muncho peor. Nin somos responsables d’ello nin creemos que’l mieu pueda emplegase indefinidamente como argumentu pa nun tomar les decisiones polítiques que tenemos que tomar.
“Facémosvos el llamáu personal a toles y tolos que tais güei equí pa facer parte d’una seronda na que podamos poner los pegoyos pa vivir una verdadera primavera asturiana en mayu.”
Asturies necesita una espresión política asturiana na Xunta Xeneral. Necesítala porque, amás, enxamás tuvimos la oportunidá de ver desplegada una política de país que valiere pa frenar la deriva inmovilista d’unes instituciones propies que, más qu’iniciatives, traen a los plenos testos redactaos en Madrid onde namás se camuda’l nome de la cámara que los tramita. Aína va siguir na xera, nesti cursu políticu que s’abre güei, d’abrir campu pa trabayar coldu a coldu con toes aquelles espresiones que nagüen por una candidatura asturiana en 2027. Llevamos selmanes faciéndolo col Partíu Verde d’Asturies, que ta güei equí y que nos trata con ciñu. Tamién con otres organizaciones sociales y polítiques, coles que tamos en contactu en movilizaciones y alcuentros nos qu’intercambiamos munchos paeceres.
Facémosvos el llamáu personal a toles y tolos que tais güei equí pa facer parte d’una seronda na que podamos poner los pegoyos pa vivir una verdadera primavera asturiana en mayu. Necesitamos l’emburrión d’idees, de propuestes, de contactos y, tamién, del sofitu económicu pa facelo. Necesitamos que se fale d’ello nos chigres, nos comercios y nos grupos de whatsapp. Que seya tema de conversación na redolada de la xente que busca alternatives a lo de siempre. A la fin, fai falta qu’espardamos esta idea pa poder consiguir, a comuña, dalgo que les compañeres y compañeros que van falar darréu de finar estes pallabres conocen y son quién a facer mui bien: condicionar les instituciones col sofitu y confianza del pueblu. Ye’l casu de les compañeres de Faciendo Morcín (Natalia Glez.), Compromisu por L.lena (David Suárez, Cai) y l’Agrupación d’Electores de Samartín (Ana Ania Glez.), organizaciones toes nes que nos fixamos porque, escontra vientu y marea, vienen afitando un espaciu políticu propiu nos sos conceyos. Nos últimos meses venimos viéndoles de cerca, tomando nota y entrugándo-yos cómo son pa facer nos sos conceyos munches coses qu’a nós prestaríanos facer en toa Asturies.
Con elles vos dexamos, y cola idea de que güei tien qu’entamar una carrera de 9 meses na que, la xente d’Aína y toles organizaciones y persones que sientan y-yos duelga Asturies tenemos que construyir dalgo guapo que llegue a la xente d’esti país.
Compañeros y compañeres, bon 8 setiembre pa toes y toos.
Puxa Mieres. Puxa Asturies.
Iyán González, Voceru Nacional d’Aína Asturies
📸 Leti Cernuda (Díes Adulces)